- شو قَولكُمْ؟ هالدرب كِلاّ طْلوعْ

وْما زالْ بَعْدو نْهارْ

ما زالْ نِمشي وْكِلّ ساعَه قْطوعْ؟

- شِدّ حَيْلَكْ عالتَعَبْ والجوعْ

ما عاد في مَهرَبْ ولا في رْجوعْ

سلاحَك مْحَبّكْ

والرِفاق كْتارْ

وْبَكّير رحْ تِقفوا الجبَلْ بَكّيرْ

وخلفِ الجبل بتصيرْ

الدروب مَرجِهْ والورودِ غْمارْ.

          ***

- شو قَولكمْ في ساحِرَهْ بالسِحرْ

- تَعمُل عَجيبي ما لِها تاني

تْرَجّع ليالي العمرْ

ويِرجَع لنا زَهوِ الشباب السمرْ

وقلوب من غير سكر سِكراني

ترقص وتهزجْ عالتلال الخضرْ

وتغزل غناني،

ومهما قِسي وتْعَطّل الصوّانْ

بْيبقى مْخَبّا بْعبّها نيسان.

وَين الصبايا زْنابق ومِرْجانْ؟

وَين الغناني تشوح بالوديانْ

وِتجاوب غْناني؟

شو ضَمّ من زَهو الشباب الفاتْ

خْيالات عَم بِتْحَوّك خْيالاتْ

تشوف الدني مْناحاتْ

وما تْمَيّز الإحيا منِ الأمواتْ.

وهَيهات سِحر الساحرهْ هَيهاتْ

يْكيدِ الزمانِ الشامتِ الجاني

يرَجّع ليالي العمرْ

وقلوب من غير سكر سكراني.

- بعِلمِ العَليم وصاحِبِ القدرَهْ

الما بيختِفي من شَعرِنا شَعرَه

إلا بيحصيها.

نبع الجَمال ومَرجَعه

وِالضاعِ هَوني بيلتِقي فيها

العمر درب

والحب ما لو حدود.

          ***

- شو قولكمْ؟ هيهاتْ

لمّن علينا

تلال سَودا بتِهبط العَتماتْ

ويهبط علينا من الجبال الريح

والتلوج كْفان بَيضا

تختفي وتْلوح،

هيهاتِ يا رْفاقِ العُمُرْ هيهات

نِحضى بكوخ وزاد وحرامات

ناكل ونسند راسْنا ونْباتْ.

- عِندَك مَضافِهْ بابها مَفتوحْ

لِلّي بيجي وبيروحْ.

          ***

- شو قولكمْ؟ قدّيش إلنا حْباب

غابوا وما رِجعوا رجعةِ الغِيّاب؟؟

- رح تِلتِقوا... وْهَونيكْ لِمْ بتْطِلّ

بْيَعرِفوك الكلّ

من دعستك، من دقّتك عالبابْ.