Tajawoz E-Magazine, February 2007 - Issue 06

 Sky Main Page »

بَعْدُن عَرَبْ
(من الياس زغيب)

بَعْدُنْ عَرَبْ وِخْيال بالعَتمِه هَرَبْ

بْحيرِة عْيونُنْ خَيَّم الحِلْمِ العَتيقْ

وِالنومْ؟...

عَمْ بينَسِّلِ خْيوط الطريقْ

وْجُوهُنْ صَحارى الهَمّْ...

والبيرِ الغَميقْ

وْبَعْدُن عَرب بالإسْم يا بْلادِِ العربْ.

باهِتْ بلونِ الظلم لَون خْيامْهُنْ

والريحْ... عَمْ تِدري رَمِلْ إيّامهُنْ

وِخْيولهُنْ بالشَمْس تَعَّبْها الضَجَرْ

والسَيف صَدّا... وْضَلّ مِتْكي

عَ الحجرْ

والصوت جايي منِ المَدى...

هِنّي صدى

هِنّي بضَعفُنْ ما حَدا...

هَمُّنْ يبيعُوا بْلادهُنْ                                 وْيغْفو على أمْجادهُنْ

ما الخَمْر طَفّا الجَمْرْ                                وْيمْرُقْ عَمَهْلو... العُمْرْ

وبْلادهُنْ تِسكر بدمّ وْلادهُنْ

المْهِمّ أوعا يزْعَلوا أسْيادهُنْ.

قانا! جرارِ العرس خَلّيها

شِريان دَمّ التضحِيي فيها

والأرض عَطشاني بطوله وْمَجْدْ

والغًَدر عَمْ يجْلُد رَوابيها

ويوعّي الشرَفْ!

ويصير ينْدَهْ: بَعْدْ

صُبَوا غضَبْ. في دَمّ يحْميها.

قانا جرار العرس مَلّيها

دَمّ الطفولة الطاهرة فيها

ولبنانْ!

ما بين الشرِقْ وِالغرْبْ

أرضِ الكَرامي لْ ما بْتِتعَبْ حَرْقْ

مِن حكم دِيني عا حِكِم فاشي

لبنان وَحدو سِرّهُنْ فاشي

لبنان هُوّي الفَرْقْ                         هُوّي ضَمير الشَرقْ

حامل خَطايا العالَم... وْماشي!

قانا جرار العرس فَضّيها

بْكاسِ العرَبْ!... والأرض فُضّيها

بَلْكي بْتِحْبَل مَكرَمي وِشْعوبْ

بْتِبْني لْبُكرا... ما بْتِبْكي لْ كانْ

ما الأندَلُسْ ضاعِ بْكَسَل وِذنوبْ

سِكْرِ وْخلاعة وْعَربدة وْنِسْوانْ

لكنْ يا قانا سَيّجوكِ قْلوبْ...

وكنتِ شَرَفْ تَمّوز... وِبْنيسانْ:

وْلادِِكْ بدَمُّنْ رَسّموا الحدودْ

وما غَدْرِ الأجنَبي... وْظلمِ اليَهودْ

دَمّ الطفولة بلَّشِ يْفِكّ القِطَبْ

وْدَمّ الأمومة يِحترقْ مِتْل اللهََبْ.

قانا، الظلمْ عَ الأرض... مش ممكِن يْسودْ

وْلولا عَ حضنِ الأجْنَبي لْ باعِكْ هرَبْ

لا تسألي وْلا تِتعَبي... ليش العَتَبْ

وِتْذّكري تاريخهُنْ يَلّلي غَرَبْ

الياس زغيب